REPUBLIC ACT 11596: ANTI-CHILD MARRIAGE LAW

“The State affirms that marriage shall be entered into only with the free and full consent of capacitated parties, and child betrothal and marriage shall have no legal effect.” (Republic Act No. 11596, Sec. 1, 2021).

Niadtong Disyembre 10, 2021, gipasa ang RA 11596, o ang Prohibition of Child Marriage Law. Kini nga balaod nagdili sa pagminyo sa mga menor de edad sa Pilipinas. Ang child marriage mao ang kaminyoon diin usa o pareho sa mga nagpakasal menor de edad, bisan pa kung kini gihimo pinaagi sa civil o church proceedings, o subay sa giila nga tradisyonal, kultural, o customary nga pamaagi.

Gikinahanglan kini nga balaod aron masiguro nga mawagtang ang child marriage, ingon man ang pagpuyo isip magtiayon nga walay kasal (live-in) tali sa mga bata, o tali sa usa ka bata ug usa ka hamtong; ug aron silotan ang mga tawo nga nagpadali o nagpatuman sa maong mga kaminyoon o panag-uban subay sa balaod.

Kinsa ang Matawag nga Bata?

Ang bata mao ang:

• ubos sa 18 anyos
• 18 anyos pataas apan dili pa makahimo sa pag-atiman ug pagpanalipod sa iyang kaugalingon tungod sa pisikal o mental nga kakulangan o kondisyon

Unsa ang legal nga epekto sa child marriage?

• Ang child marriage walay legal nga bisa gikan pa sa sinugdanan.
• Ang bata nga naminyo dili adunay parehas nga katungod ug responsibilidad sama sa usa ka legal nga magtiayon.
• Mahimong mosang-at og petisyon sa korte aron ipahayag nga walay bisa ang maong kaminyoon bisan kanus-a.
• Kung mapawong ang kaminyoon, ang mga butang sama sa suporta, pagbahin sa kabtangan, ug pag-atiman sa mga anak pagadumalahan sumala sa Family Code sa Pilipinas.

Sumala sa balaod mahimong silotan ang inahan o amahan nga nag-arrange sa kaminyoon sa ilang menor de edad nga anak ngadto sa usa ka hamtong, bisan pa nga kabahin kini sa ilang tribal o cultural tradition. Wala gitugot ang mga ginikanan nga mag-arrange o magpahigayon sa kaminyoon sa ilang menor de edad nga anak ngadto sa usa ka hamtong, bisan pa nga kini kabahin sa ilang tribal, cultural, o customary tradition, mahimong manubag ubos sa balaod, human sa transitory period nga gitakda sa balaod.

Dugang pa, dili exempted ba ang mga Tribal o Indigenous Peoples sa maong balaod. Sumala sa Section 2 sa RA 11596, ang Estado nagtumong sa pagwagtang sa mga tradisyonal ug kultural nga praktis o sistema nga nagpadayon sa diskriminasyon, pag-abuso, ug pagpahimulos sa mga bata, lakip na ang child marriage. Busa, dili exempted ang mga tribal o Indigenous Peoples sa pagpatuman niini nga balaod, bisan pa man kung ang maong praktis kabahin sa ilang kultura o tradisyon.

Wala sad gitugotan ang mga batang Muslim o menor de edad nga magpakasal. Ubos sa RA 11596, dili tugotan ang pagpakasal sa mga bata o menor de edad. Ang mga probisyon sa ubang balaod nga supak niini, lakip ang Article 16 sa Presidential Decree No. 1083 o Code of Muslim Personal Laws, giusab o giwagtang aron mahiuyon sa maong balaod.

Ang mga Gidili nga Buhaton Ubos sa RA 11596:

• Facilitation of  Child Marriage (Pagpahigayon o Pag-abag sa Kaminyuon sa Bata) - Pagtabang, pag-andam, o pagpasayon sa pagminyo sa bata, apil ang paggamit og peke o giusab nga mga dokumento aron ipakita nga mas tigulang ang bata.
  • Pagkabilanggo og 10 ka tuig ug multa nga dili moubos sa ₱40,000 (kung dili paryente ang nakasala).
  • Pagkabilanggo og 12 ka tuig ug multa nga dili moubos sa ₱50,000 (kung paryente ang nakasala).
• Solemnization of  Child Marriage - Pagpahigayon o pagdumala sa seremonya sa kasal nga nagresulta sa pagminyo sa bata.
  • Pagkabilanggo og 12 ka tuig ug multa nga dili moubos sa ₱50,000.
• Cohabitation of an Adult with a Child Outside Wedlock - Pagpuyo isip magtiayon kauban ang usa ka menor de edad
  • Pagkabilanggo og 12 ka tuig ug multa nga dili moubos sa ₱50,000 nga ipahamtang sa hamtong.

Kung ang nakasala usa ka opisyal sa gobyerno, adunay dugang nga silot nga permanente siyang dili na mahimong makatrabaho o makapwesto pag-usab sa bisan unsang katungdanan sa gobyerno.

Mga Ahensya sa Gobyerno nga Adunay Katungdanan sa Pagpatuman:

• Department of Social Welfare and Development
• Council for the Welfare of Children (CWC)
• Department of Justice (DOJ)
• Department of the Interior and Local Government (DILG)
• Department of Education (DepEd)
• Department of Health (DOH)
• Supreme Court of the Philippines
• Philippine Commission on Women (PCW)
• Commission on Human Rights (CHR)
• National Commission on Muslim Filipinos (NCMF)
• National Commission for Indigenous Peoples (NCIP)

Unsaon nato pagsuporta sa paningkamot sa pagtapos sa child marriage?

• Tabangan nato ang paghimo og usa ka komunidad nga adunay maayong sosyal nga palibot nga dili mosuporta o modawat sa child marriage.
• Likayan ang dugang nga pagpasakit o pagpahimulos sa bata pinaagi sa paghatag og hustong pag-atiman ug suporta nga sensitibo sa gender ngadto sa mga batang nakasinati niini.
• Hatagan og gahum ang mga bata pinaagi sa paghatag kanila og saktong impormasyon, mga kahanas, ug kasaligan nga network sa suporta.
• Suportahan ang edukasyon sa mga batang babaye pinaagi sa pagpalambo sa ilang access ug pagkompleto sa dekalidad nga edukasyon.
• Edukaron ug hatagan og gahum ang mga ginikanan ug mga lider sa komunidad aron sila mismo modiskuraha ug motabang sa pagwagtang sa child marriage.

Ang maong balaod naglangkob sa tanan, bisan unsa pa ang relihiyon, kultura, o tradisyon. Ang paglapas ani nga balaod sa katungod sa mga bata mahimong makaapekto sa ilang edukasyon, kaugmaon, ug kahimsog.